အပြစ်ဖြေလွှတ်ကယ်တင်ခြင်း (Atonement)
အပိုင်း ၅

(အပိုင်း ၁မှ ၄ အကျဉ်း ....အပိုင်း ၁ တွင် ဤအခန်းဆက် ဆောင်းပါးရှည် တစ်ခုလုံး၏ ရည်ရွယ်ချက်ကို ဖော်ပြခဲ့ပါသည်။ အပြစ်လွှတ်ကယ်တင်ခြင်း ဖြစ်စဉ်တစ်ခုလုံး Atonement ကို မြင်သော အမြင်များကို နာမည်တစ်ခုချင်းဆီ ဖော်ပြခဲ့ပြီး အပိုင်း ၁ တွင် Ransom Theory၊ အပိုင်း ၂ တွင် ဒုတိယ အမြင်တစ်ခုဖြစ်သော Satisfication Theory၊ အပိုင်း၃ တွင် Christus Victor Theory နှင့် ပြီးခဲ့သည့် အပိုင်း (အပိုင်း၄) တွင် Moral Influence Theory ကို အားနည်းချက် အားသာချက်များနှင့် တစ်ကွ ဖော်ပြခဲ့ပါသည်။ ယခု အပိုင်းတွင်လည်း John Calvin ရဲ့ atonement ဆိုင်ရာ ဒဿနကို တင်ပြမည်ဖြစ်ပါသည်။)

ပြစ်မှုဆိုင်ရာ အစားထိုးခြင်း နားလည်မှု (The Penal Substitution Theory)
          Anselm ၏ Satisfaction အကြောင်းကို အပိုင်း၂ တွင် ဆွေးနွေးပြီးဖြစ်ပါသည်။ Anselm ၏ အမြင်နှင့် ဆန့်ကျင်စွာပင် ဤအမြင်သည် ခရစ်တော်အသေခံခြင်းကို ဘုရားသခင်ထံ ကိုယ်စားအပြစ်ဒဏ် ခံခြင်းအဖြစ် လက်ခံခြင်းဖြစ်ပါသည်။ ဤအမြင်ကို အစပြုသူမှာ ခရစ်ယာန်သမိုင်းတွင် နာမည်ကျော်ကြားသော John Calvin ပင်ဖြစ်ပါသည်။
         ရှေ့နေတစ်ယောက်အဖြစ် ကနဦး အသက်မွေးဝမ်းကြောင်းပြုသော ပြင်သစ်လူမျိုး Calvin ၏ ဒဿနတွင် ခရစ်တော်အသေခံခြင်းနှင့်စပ်ဆိုင်၍ ပြစ်မှုပြစ်ဒဏ်ဆိုင်ရာ အသုံးအနှုန်းများ ပါဝင်နေသည်မှာ အထူးအဆန်းတော့ မဟုတ်ပေ။ ၎င်းက ဘုရားသခင်၏ တရားမျှတခြင်းဟု ဆိုရာ၌ လူသားတို့ အမှားအတွက် ပြစ်ဒဏ်ကို ကျေနပ်စွာခံယူခြင်းသည်လည်း ပါဝင်သည်ဟုဆိုပါသည်။ ပြစ်ဒဏ်ပေးခြင်းမပါဘဲ လူသားကို အပြစ်မှလွှတ်ခြင်းသည် သဘာဝမကျဟု ၄င်းကဆိုပါသည်။
Calvin အတွက် သခင်ခရစ်တော် အသေခံခြင်းသည် Satisfaction Theoryကဲ့သို့ ဘုရားသခင် ကျေနပ်စေရန်အတွက် မဟုတ်ဘဲ လူသားတို့ကျခံရမည့် ပြစ်ဒဏ်အတွက် ကိုယ်စားကျခံခြင်းဖြစ်သည်ဟု နားလည်ပါသည်။
           သခင်ခရစ်တော်အားဖြင့် ဘုရားသခင်နှင့် လူသားတို့ကြား ပြန်လည်မသင့်မြတ်ခင်က လူသားသည် ဘုရားသခင်၏ ရန်သူဖြစ်ပါသည်။ ဘုရားသခင်၏ အမျက်တော်နှင့် ထိုက်တန်သောသူများဖြစ်ပါသည်။ ထာဝရသေဆုံးခြင်း၌သာ အဆံုးသတ်မည်ဖြစ်ပါသည်။ သို့ရာတွင် ဘုရားသခင်၏ ချစ်ခြင်းမေတ္တာက လူသားတို့ကို အခွင့်အလမ်းတစ်ခုပေးရန် လုပ်ဆောင်လာပါသည်။ အဆိုပါ လုပ်ဆောင်မှုသည်ကား သခင်ခရစ်တော်၏ ကိုယ်စားအသေခံကာ အပြစ်ဒဏ်ခံပေးခြင်းဖြစ်သည် ဟု Calvin က ဆိုပါသည်။
            Calvin က ခရစ်တော်အသေခံခြင်းနှင့် စပ်ဆိုင်၍ substitute ဟူသော အသံုးအနှုန်းကို စတင် အသုံးပြုလာပါသည်။ Calvin အတွက် ခရစ်တော် အသေခံခြင်းသည် အစားထိုးခြင်းသာမက အလဲအထပ်သဘောလည်း ပါပါသည်။ ဤatonement အမြင်နှင့် စပ်ဆိုင်၍ Calvin နောက်ထပ် စတင်အသုံးပြုသော ဝေါဟာရမှာ propitiation ဟူသော အသုံးအနှုန်းဖြစ်ပါသည်။ အဓိပ္ပာယ်မှာ အမျက်တော်ငြိမ်းရန်အတွက် ပူဇော်ပသခြင်း ဆိုသည့်သဘောဖြစ်ပါသည်။
            ထို့အပြင် Calvin ၏ atonement ဆိုင်ရာ ဒဿနသည် သခင်ခရစ်တော်ရှင်ပြန်ထမြောက်ခြင်းနှင့် ဆက်စပ်လျက်ရှိပါသည်။ ရှင်ပြန်ထမြောက်ခြင်းမရှိလျှင် အသေခံခြင်းသည် မျှော်လင့်ချက်မဲ့မည်သာဖြစ်ပါသည်။ သခင်ခရစ်တော်ရှင်ပြန်ထမြောက်ခြင်းသည် လူသားအတွင်းသို့ ခရစ်တော်၏ ပါဝါများ ရှိလာကာ သေခြင်း မကောင်းမှုကို ရင်ဆိုင်နိုင်မည် ဟု ဆိုပါသည်။ ထို့ကြောင့် ဤ Penal Substitution Theory တွင် Christus Victor Theory ၏ အိုင်ဒီယာ ကိုလည်း တွေ့နိုင်ပါသည်။
                ဤ Penal Substitution Theory တွင် လည်း အားနည်းချက် အားသာချက်များရှိပါသည်။ ပထအားသာချက်မှာ ဤအမြင်သည် ကျမ်းသဘော ထောက်ခံမှုရှိခြင်းဖြစ်ပါသည်။ ၂ကော ၅:၂၁၊ ဂလာတိ ၃:၁၃၊ ဟေဗြဲ ၉:၂၂၊ ရောမ ၆:၂၃ တို့ကိုကြည့်ပါက အဆိုပါသဘောမျိုးကို တွေ့ရမည်ဖြစ်ပါသည်။ နောက်ထပ်အားသာချက်တစ်ခုမှာ ဤဒဿနသည် ခရစ်တော်၏ အသေခံခြင်းနှင့် ရှင်ပြန်ထမြောက်ခြင်းကို ဆက်စပ်နားလည်နိုင်ပါသည်။
                 သို့ရာတွင် အားနည်းချက်များလည်းရှိပါသည်။ ပထမတစ်ချက်မှာ ကယ်တင်ခြင်းဟူသော ခေါင်းစဉ်အောက်တွင် အကြမ်းဖက်မှုကို အားပေးအားမြှောက်ပြုသကဲ့သို့ပင်ဖြစ်ပါသည်။ အသေသတ်ခြင်း အသေခံခြင်း သေဒဏ်သည် အပြစ်ပေးခြင်း သဘောလားဟူ၍ မေးစရာပင်ဖြစ်ပါသည်။ အဖေက သားကို အပြစ်ပေးရာတွင် သေသည့်အထိ ဆိုသည်မှာ ကလေးသူငယ်အကြမ်းဖက်ခြင်း၌ ထောက်ပြစရာများဖြစ်လာပါသည်။
                  ဒုတိယအားနည်းချက်မှာ ဤအမြင်တွင် ဘုရားသခင်၏ ခွင့်လွှတ်ခြင်းကို ရှာမတွေ့နိုင်ပေ။ အပြစ်ကြွေးဆပ်ပြီးမှသာ ပြန်လည်သင့်မြတ်သည်ဟူသော အမြင်သည် ဘုရားသခင်၏ ခွင့်လွှတ်ခြင်းအတွက် မေးခွန်းထုတ်စရာပင်ဖြစ်ပါသည်။ တတိယအားနည်းချက်မှာ အစားထိုးခြင်းပြသနာပင်ဖြစ်သည်။ အစားထို၍ရသလား။ မကောင်းမှုကျူးလွန်ပြီးလျှင် အပြစ်မရှိသူကို အစားထိုးခြင်းသည် မှန်ကန်သည့် အပြစ်ဒဏ်ပေးခြင်းကို ဦးတည်နိုင်မည်လားဟူသော မေးခွန်းပင်ဖြစ်ပါသည်။
           ဤအမြင်သည် ယခုခေတ် ခရစ်ယာန်များအကြားတွင်လည်း ကျယ်ကျယ်ပြန့်ပြန့် တွေ့နိုင်ပါသည်။ အထူးသဖြင့် သမရိုးကျ လက်ခံသော ခရစ်ယာန်များနှင့် ဧဝံဂေလိ ခရစ်ယာန်များအကြားတွင် တွေ့နိုင်သော အပြစ်လွှတ်ခြင်းဆိုင်ရာ ဒဿနိကပင်ဖြစ်ပါသည်။

(အပိုင်း ၅ ပြီးပါပြီ။ အပိုင်း ၆ တွင် ခရစ်ယာန် မနုဿဗေဒပညာရှင် တစ်ဦးဖြစ်သော René Girard ၏ Atonement ဆိုင်ရာ နားလည်မှု ကို ဆက်လက်တင်ပြမည်ဖြစ်ပါသည်။)
Reference
-Allister E McGrath, Christian Theology; An Introduction, 6th ed (Blackwell, 2017)
-Andrew Sung Pak, Triune Atonement (Westminster John Knox Press, 2009)
-Jonathan Hill, The History of Christian Thought (A Lion Book,2003)